Tameiga e a plataforma Ulloa Viva alíanse para celebrar o primeiro festival na defensa da terra
| O I Festival Salvamontes será o 15 e 16 de novembro na Rebullón, en beneficio da plataforma Ulloa Viva, con abonos desde só 15 € Ulloa Viva e Tameiga únense pola terra e os recursos naturais, contra os grandes proxectos que os ameazan: o GS360 e Altri. |
| Mos, 31 de outubro de 2024.– A Comunidade de Montes de Tameiga e a plataforma Ulloa Viva únense para celebrar o I Festival Salvamontes, o primeiro festival na defensa da terra e os recursos naturais, en beneficio da plataforma Ulloa Viva. O I Festival Salvamontes xurde como resposta á ameaza de desenvolvemento de sendos macroproxectos económicos e comerciais cun elevando impacto en áreas naturais, ambos co apoio da administración autonómica. No caso da Comunidade de Montes de Tameiga, o GS360 que promove o grupo GES da familia Mouriño, tamén propietaria do Real Club Celta; en Palas de Rei, a celulosa portuguesa Altri. O festival busca informar e concienciar do profundo dano que causarían estes proxectos. Tanto Tameiga como a plataforma Ulloa Viva comparten a súa defensa dun modelo económico compatible co respecto ao patrimonio ambiental galego, á paisaxe e á biodiversidade, ao tempo que rexeitan o desenvolvemento de dous proxectos industriais de dubidosa legalidade tendo en conta as directivas ambientais europeas, que ademais afectarían gravemente ao noso medio ambiente e aos recursos naturais dispoñibles para a veciñanza. Por exemplo, a implantación de Altri causaría un deterioro significativo e irreversible ao auga do río Ulla e dos ecosistemas dependentes, mentres que o GS360 secaría os acuíferos que abastecen a 5.000 persoas de Mos. Por outro lado, no tocante ao impacto na masa arbórea, suporía a proliferación do eucalipto na Ulloa e en Galicia, e a devastación de máis superficie forestal na área de Vigo, tan necesaria sobre todo en zonas periurbanas. Ademais, o modus operandi para Altri e o GS360 é moi similar. Ambos proxectos non cumprían os requisitos para a súa implantación, así que a Xunta pretende declaralos como proxectos de interese estratéxico para Galicia, evitando así o cumprimento das leis e facilitando a expropiación do solo para as grandes empresas. Co I Festival Salvamontes, Tameiga e Ulloa Viva buscan recadar fondos para a plataforma con Altri e tamén sensibilizar á cidadanía da importancia crucial de preservar os nosos recursos naturais e a masa forestal galega. Como parte do movemento Salvamontes, son espazos multifuncionais imprescindibles para a calidade de vida da sociedade, con valor patrimonial e paisaxístico, que absorben CO2, proporcionan oxígeno, actúan contra o quecemento global, e ofrecen lugares de lecer e fonte de recursos naturais (auga, biomasa, etc) para a veciñanza. O cartel Cun carácter solidario e de apoio á plataforma cidadá, o I Festival Salvamontes vaise celebrar na sala Rebullón durante dous días: 15 e 16 de novembro. Actuarán seis bandas e as entradas xa están á venda online e na cantina do CSCD As Pedriñas, tanto de día (10 €) como o abono desde só 15 euros en anticipada. En billeteira, 18 euros o abono e 13 euros a entrada dun día. Os concertos comezarán ás 21 horas. O venres, 15 de novembro, actuarán Tiam GZ, Flow do Toxo e Willow GHZ. Tiam GZ é rap, reivindicación e pura festa. Desde o dembow á muiñeira, ningún ritmo se lles escapa. Nos seus directos, os da comarca de Chantada misturan a súa identidade rapeira cunha sesión de DJ, coa que van construindo unha homenaxe á nosa terra. Flow do Toxo, grupo integramente feminino, presentan o seu primeiro traballo, “Aquí están as que ghritan”, un berro persoal e colectivo desde o rural, co rap como forma de reivindicación directa e sen complexos. Música para pasalo en grande. Willow GHZ é o pseudónimo de Darío Burgo, un dos artistas emerxentes máis interesantes da escena musical urbana en Galicia. A súa música move entre o trap, e o hip hop. Natural de As Neves tamén é o cantante da banda Keixa. Ao día seguinte, o sábado 16, outras tres formacións subiranse ao I Festival Salvamontes pola defensa da terra. O Leo de Matamá é coñecido polo seu estilo irreverente, mesturando rock, punk e influencias da cultura popular galega, con temas humorísticos e satíricos, sempre con toques de retranca galega. O Leo combina o humor con mensaxes que buscan facer reflexionar. Sun Iou é a gran promesa e revelación do rock&roll en galego. Procedentes do barrio vigués de Teis, a banda está a presentar o seu primeiro traballo, “Agora”, lanzado este mesmo ano, unha coidada mestura de rock&roll e tradición con engaiolantes harmonías vocais. Por último, os composteláns Ruxe Ruxe, clásicos e referentes da escea rock e punk galega, con preto de trinta anos de exitosa traxectoria. Este ano, a banda ofreceu varios concertos en Irlanda nos que presentou temas do seu próximo e agardado traballo. O movemento Salvamontes Coa ameaza do proxecto GS360 como punto de partida, o Salvamontes xurde como un movemento transversal, aberto e apolítico para concienciar á cidadanía da área de Vigo –e ás entidades públicas e privadas- da necesidade de preservar a nosa masa forestal. Se és un ou unha “salvamontes”, podes inscribirte e sumar o teu apoio á causa, recibir as novas e estar informado das actividades deste movemento. Especialmente nas áreas periurbanas, os montes son espazos multifuncionais imprescindibles para o progreso e a calidade de vida da sociedade. Gozan de valor patrimonial e paisaxístico, absorben CO2, proporcionan oxígeno, actúan contra o quecemento global, son lugares de lecer e fonte de recursos naturais (auga, biomasa, etc) para a veciñanza. En Galicia, o monte representa a nosa identidade, un elemento de unión entre o pasado e o futuro, un modo de vivir e entender esta terra que debemos protexer, por nós e polas xeracións vindeiras. Porque sen a nosa masa forestal non teremos unha Galicia verde. Ata o momento, baixo o paraugas do movemento Salvamontes xa se organizaron actividades socioculturais como un magosto, un feirón de artesanía, ou un trail polos montes de Tameiga, cun gran éxito de participación. |
Outras novas
